IES RODEIRA 18/19

Crónica 1º Bach. “B” contra 1º Bach. “D” - 20/05/2019

Colexiado: Martínez Leis

Incidencias: 1-0 (Javier Pereira); 1-1 (Borja Rodríguez); 2-1 (Jorge Guimeráns); 2-2 (Borja Rodríguez); 2-3 (Aarón Lemos); 3-3 (Javier Pereira). Penaltis: 0-0; 1-0; 1-0; 1-0;1-1;1-1;1-1;2-1



1º Bach “B” gaña a penaltis e xogará a gran final

Os de “B” medíronse a 1º Bach. “D” nun derbi emocionante e igualado que se tivo que resolver na lotaría dos penaltis
O segundo partido de semifinais do torneo do IES Rodeira contou cun gran número de espectadores dende a bancada e non era para menos, pois víronse a cara os dous conxuntos de 1º de Bacharelato nun derbi para o recordo.

O encontro comezou coa toma de contacto de ámbolos dous equipos, sen claras ocasións de gol. Aos cinco minutos aproximadamente, Javier Pereira abría o casilleiro rematando ao primer toque o pase de Jorge Guimeráns, tras recuperar o balón. Dende ese momento os ataques de B sucedíanse uns tras outros, tendo que intervir o porteiro Antón en varias ocasións. Nun destes contra ataques, o gardameta de “D” arrebátalle o coiro a Óscar Gómez e sérveo con rapidez para Borja Rodríguez que, cunha sensacional carreira pola banda, poñía as tablas no luminoso. Pero os locais continuaron atacando e sería no minuto 10 cando Jorge Guimeráns firmaría o mellor tanto da mañá: pase dende atrás e remate co calcaño da bota que batía por baixo a Antón. Nos derradeiros minutos serían os de “D” os que intentasen buscar o gol e atoparíano grazas a un dubidoso penalti sobre Borja Rodríguez, que sería transformado por el mesmo. Chegábase ao descanso con 2 a 2.

Á volta dos vestiarios, os visitantes sairían coas ideas máis claras e non cesarían de atacar a portería defendida por Pablo, que salvou ao seu equipo con boas paradas. Pero o gardarredes nada puido facer na gran xogada culminada por Aarón Lemos que poñía por diante a “D”. Pero, a partires do 2-3, o xogo dos visitantes comezaría a verse mermado pola presión dos seus rivais e pola falta de ideas na zona de creación. Dende o minuto 5 da segunda parte o asedio de “B” foi imparable e os visitantes sostiveron a vitoria momentánea grazas ao acerto defensivo e ás intervencións de Antón. Cando só quedaban 5 minutos para o pitido final, Javier Pereira lánzase ao contra ataque e, tras zafarse dos defensas e realizar un amago para recortar ao porteiro, devolvía o empate.

Chegábase pois aos penaltis. O primeiro en lanzar foi Borja Rodríguez. O seu lanzamento á esquerda é detido por Pablo; quenda para Javier Pereira que non falla; segundo penalti para “D”. Esta vez é Aarón Lemos que tira ao mesmo lado que no anterior penalti, e volve ser detido por Pablo; tira Daniel Lorenzo para os locais e o seu disparo repéleo Antón. Con 1-0 Aarón Refojos disponse a tirar. Esta vez consegue enganar a Pablo cun potente disparo á dereita. Con 1-1 se Jorge Guimeráns marca, os locais pasan a final. Tiro a media altura á esquerda que consegue sacar Antón Iglesias; tócalle a Juan Tenreiro que envía o balón fóra e con el gran parte das aspiracións de “D”. O penalti de Óscar Gómez pode ser definitivo. Se marca o 2 a 1 o seu equipo pasa á final. Tiro potente ó medio, ao que nada pode facer Antón.

A ledicia dos de “B” é inmensa, pois clasifícanse para a final contra todo pronóstico. Esta vez o fútbol foi cruel con “D”, un equipo que propuxo un xogo moi vertixinoso e combinativo, pero que perdeu a penaltis contra un digno rival e digno vencedor. Noraboa para os gañadores que se verán as caras na gran final contra 2º Bach. “D”.